នាព្រឹកថ្ងៃទី២១ ខែមីនា ឆ្នាំ២០២៤នេះ ឯកឧត្តម សុខា រ៉ាម អភិបាលរងខេត្តស្វាយរៀង តំណាងឯកឧត្តម ប៉េង ពោធិ៍សា អភិបាលខេត្ត និងលោក ឃួន សាវុធ អគ្គនាយករងនៃអគ្គនាយកដ្ឋានការពារអ្នកប្រេីប្រាស់កិច្ចការប្រកួតប្រជែង និងបង្ក្រាបការក្លែងបន្លំ បានអញ្ជេីញជាអធិបតីក្នុងកម្មវិធីសិក្ខាសាលាផ្សព្វផ្សាយច្បាប់ស្តីពីសុវត្ថិភាពម្ហូបអាហារ ច្បាប់ស្តីពីកិច្ចការពារអ្នកប្រេីប្រាស់ និងគោលការណ៍ណែនាំមួយចំនួនពាក់ព័ន្ធនឹងការផលិតស្រាប្រកបដោយសុវត្ថិភាព។
អញ្ជេីញចូលរួមក្នុងសិក្ខាសាលានេះរួមមាន តំណាងឯកឧត្តមប្រធានសាលាដំបូងខេត្ត តំណាងឯកឧត្តមព្រះរាជអាជ្ញានៃឯយ្យការអមសាលាដំបូងខេត្ត ឯកឧត្តម លោក លោកស្រី ប្រធានអនុប្រធាន នៃអគ្គនាយកដ្ឋាន ក.ប.ប លោកស្រីនាយករងរដ្ឋបាលសាលាខេត្ត លោកឧត្តមសេនីយ៍កងកម្លាំងប្រដាប់អាវុធទាំង៣ ឯកឧត្តម លោក លោកស្រីប្រធានមន្ទីរ-អង្គភាពនានាក្នុងខេត្ត លោក លោកស្រីនាយកទីចាត់ការ/អង្គភាពចំណុះសាលាខេត្ត លោកប្រធានក្រុមប្រឹក្សាក្រុងស្រុកទាំង៨ លោកអភិបាលក្រុងស្រុកទាំង៨ លោក លោកស្រីមេឃុំ ចៅសង្កាត់ទាំង៨០ ក្នុងខេត្ត ម្ចាស់សិប្បកម្មផលិតស្រាក្នុងខេត្ត និងលោកស្រីម្ចាស់អាជីវកម្មស្រាថ្នាំក្នុងខេត្តសរុបវត្តមានចំនួន១៧០នាក់។
មានប្រសាន៍ទៅកាន់ពិធីនេះ ឯកឧត្តមអភិបាលរងខេត្តបានលេីកឡេីងថា សិក្ខាសាលាផ្សព្វផ្សាយច្បាប់ ស្តីពីសុវត្ថិភាពម្ហូបអាហារ ច្បាប់ស្តីពីកិច្ចការពារអ្នកប្រើប្រាស់កិច្ចការ ប្រកួតប្រជែង និងគោលការណ៍ណែនាំមួយចំនួន ពាក់ព័ន្ធនឹងការផលិតស្រាប្រកបដោយសុវត្ថិភាព នាឱកាសនេះ គឺពិតជាមានសារៈសំខាន់ដល់សិប្បករ អ្នកផលិតផលគ្រប់ប្រភេទក្នុងខេត្ត ដើម្បីពង្រឹងសមត្ថភាពអ្នកផលិត និងកែច្នៃផលិតផលដោយគុណភាពនិងលក់មានទីផ្សារ ដូច្នេះសមាជិក សមាជិកាទាំងមូល សូមយកចិត្តទុកដាក់ស្តាប់បទបង្ហាញពីវាគ្មិនប្រកបដោយបទពិសោធន៍ និងជំនាញក៏ដូចជាលើកជាសំនួរ និងចូលរួមផ្តល់មតិយោបល់ឱ្យបានច្រើន ដើម្បីជាចំណេះដឹង ក្នុងការអភិវឌ្ឍផលិតផលរបស់ខ្លួនផងដែរ។
ឯកឧត្តមបន្តថា សិក្ខាសាលានេះជាវេទិកាមួយក្នុងការជួបជុំរវាងអ្នកអនុវត្តច្បាប់ និងធុរជន ដើម្បីពិភាក្សាគ្នាលើបញ្ហានានាដែលពាក់ព័ន្ធនឹងកិច្ចការពារ អ្នកប្រើប្រាស់ សុវត្ថិភាពម្ហូបអាហារ និងលិខិតបទដ្ឋានពាក់ព័ន្ធនឹងការធ្វើអាជីវកម្មស្រា ហើយអាចផ្លាស់ប្តូរ ចែករំលែកនូវបទពិសោធន៍ល្អៗ ដេីម្បីស្វែងរកដំណោះស្រាយ បញ្ហាប្រឈមនានា និងចូលរួមអនុវត្តច្បាប់ទាំងនេះឱ្យមានប្រសិទ្ធភាព៕
